സൂചീമുഖം

ഉണ്ണിക്കൃഷ്ണൻ ചെറുതുരുത്തി

ഏറെ പ്രതീക്ഷയോടത്രേ കളിയച്ഛ-

നായാൾക്കു കച്ചയും നൽകീ മെഴുക്കു, മീ

പ്രായത്തിലഭ്യസിച്ചോനാണു താൻ, തന്റെ

ദേഹത്തു പണ്ടേയുഴിഞ്ഞുഴിഞ്ഞെല്ലുക-

ളേതുവഴിയ്ക്കും വളയ്ക്കാം, ചുഴിപ്പിനു

ചാരുത കൂടും. മുഖത്തുനിന്നും രസം

പ്ലാവിലകൊണ്ടു വടിച്ചെടുക്കാം, തിര-

ശ്ശീലയ്ക്കു പിന്നിൽ താനെത്തുന്നതോതുന്ന

കച്ചമണിക്കിലുക്കത്തിനായ്‌ കാക്കുന്നു

മുറ്റത്തു തമ്പുരാൻ പാതിരയ്ക്കും, മണ്ണി-

ലൊറ്റനാക്കേതാണ്ടിഴയും വിധം താണു

മുദ്ര പിടിയ്ക്കാം; നടിയ്ക്കാം; സ്വശിഷ്യന്നു-

മുത്തമശിക്ഷണംകൊണ്ടാദ്യവസാന-

മുഖ്യവേഷങ്ങൾ വഴങ്ങണമെന്നോർത്തു

തൂശിയ്ക്കിരുത്തീ, മുളയ്ക്കിട്ടു, ദൃഷ്ടിയ്ക്കു

സാധകം നന്നെപ്പുലർച്ചയ്ക്കു ചെയ്യിച്ചു,

കൊണ്ടുനടന്നു കളിയ്ക്കു, കൂടെ, ത്തന്റെ

മുണ്ടും മുറുക്കാനുമേറ്റിച്ചു,നല്ലൊരു

നാളും മുഹൂർത്തവും നോക്കി, യരങ്ങേറ്റ-

വേള കുറിച്ചു, കഥ നിശ്ച്ചയിച്ചു, താൻ

കേശഭാരം വെച്ചു, ദക്ഷിണ വാങ്ങിച്ചു,

നേരെ രംഗത്തേയ്ക്കു വിട്ടതാണ്‌-എന്തിനു

ശേഷം കഥിയ്ക്കുന്നു-കൂട്ടിക്കൊടുപ്പിന്റെ

വേഷം തനിയ്ക്കു വഴങ്ങില്ലയെന്നയാൾ

ഒറ്റപ്പിടുത്തം- അരങ്ങും കളരിയും

വെയ്ക്കുന്നു മൂക്കിൻമുഖത്തു സൂചീമുഖം!