പി.കെ.ഗോപി
സംസാരിച്ചു ശീലിച്ചവന്
മുഖം കണ്ടാല്‍
വെട്ടിപ്പിളര്‍ക്കാനാണ് തോന്നുക.
മുക്കുപണ്ടങ്ങള്‍
മാറിലണിഞ്ഞു ശീലിച്ചവന്
മുപ്പതു വെള്ളിക്കാശു കണ്ടാല്‍
മുട്ടുകുത്താനാണ് തോന്നുക .
ചില്ലു കൊട്ടാരത്തില്‍
ചിലന്തിയായി പരിണമിച്ചവന്
പ്രണയഹിംസയുടെ
വിധിന്യായം
ശരിവയ്ക്കാനാണ് തോന്നുക.
പ്രളയവാര്‍ത്തയില്‍
തോണിയിറക്കി ശീലിച്ചവന്
അമ്മയൊഴുക്കിയ
കണ്ണീരിനെ
അവഗണിക്കാനാണ് തോന്നുക.
ജലപുഷ്പത്തില്‍
വീണ വച്ച കുറ്റത്തിന്
ബലി നല്‍കേണ്ടിവന്നത്
കര മുഴുവനുമായിരുന്നുവെന്ന്
കപ്പലോട്ടിയ
കച്ചവടക്കാരൊഴികെ
മറ്റാരും
തിരിച്ചറിഞ്ഞില്ലല്ലോ.!
