 |
| പി.കുഞ്ഞിരാമൻ നായർ |
വന്നൂ വന്നൂ പൊൻചിങ്ങം!
പുലരൊളി തിരളും പൊൻചിങ്ങം
പുതുമലർ വിരിയും പൊൻചിങ്ങം
പുളകമുണർത്തും പൊൻചിങ്ങം!
പരിപാവനമാമേലാ മലയജ
പരിമളമിളകും മലനാട്ടിൽ
തങ്കക്കതിരുകളുണ്ണാനെൻ പുതു-
ചിങ്ങപ്പൂങ്കിളി വന്നാലും
പാവനമാകിന നിൻതിരുനാളിൽ
പൂവിളി ഞങ്ങൾ മുഴക്കുന്നു
ത്വൽക്കഥ ഗാഥയിലിടചേർത്തെങ്ങും
പൂക്കളമിങ്ങു ചമയ്ക്കുന്നു
വറുതി തകർക്കും തങ്കക്കതിരിൻ
തിരുമുടി താണുവണങ്ങുന്നു
വടിവിൽക്കസവുകൾ മിന്നും വെള്ള-
പ്പുടവയുടുത്തു ചമഞ്ഞിപ്പോൾ
എരിപൊരികൊള്ളും കരളിൽ മോഹന-
മുരളികയൂതാൻ വന്നാലും
അല്ലിൽ കളഭച്ചെപ്പു തുറന്നിടു-
മത്തപ്പൂക്കൾ ചിരിക്കുമ്പോൾ
ചേണഴകാറ്റിൽത്തോണികളിപ്പാ-
നോണനിലാവേ വന്നാലും!
വന്നൂ വന്നൂ പൊൻചിങ്ങം!
പുലരൊളി തിരളും പൊൻചിങ്ങം
പുതുമലർ വിരിയും പൊൻചിങ്ങം
പുളകമുണർത്തും പൊൻചിങ്ങം!
